الاثنين، 7 فبراير 2011

وجدتها حل ليوم الجمعه

السلام عليكم ورحمه الله وبركاته
بقالى يومين بفكر فى يوم الجمعه وهل الصح أنى أنزل ولا أكون فى البيت متابع
ولا فى اللجان الشعبيه
خدت رأى ناس كتير ممكن نعمل أيه يوم الجمعه وهل شرعا ننزل ولا لأ
وهنا تضارب بين القرضاوى وشيخ الأزهر حتى أهل الدين مختلفين
والله أعلم يمكن فى أختلافهم رحمه
قلت أرتكز لعقلى أشوف الجزيره أكره البلد والريس والدنيا
أشوف التلفزيون المصرى الفاشل قنوات بارده وقله أدب
قولت أفكر بالطاقه وقانون الجذب اللى بيقول فى تردد فكرى عام
دلوقتى للناس كله توتر فأكيد هيأثر على تفكيرى وطاقتى
يعنى الحكم دلوقتى صعب جدا والشىء الوحيد اللى هيخرجنا منه
رحمه ربنا

أحيانا الحل بيبقى بين أيدينا ومش شايفينه
الحل أننا نشيل التوتر علشان نعرف نفكر والحل الوحيد اللى بين أيدينا دلوقتى
ومش شايفيته هو القرأن الكريم

والله العظيم الحل دلوقتى فعلا هو القرأن الكريم لأنه بيظبط التردد العقلى
وبيشيل التوتر ويخليك تفكر أحسن
يبقى علشان تاخد قرار أسمع القرأن علشان تطمئن وبعدها صلاه الأستخاره
لأخذ القرار لهذا اليوم

والخطه كالتالى شغل أبتدأ من فجر الجمعه القرأن الكريم فى بيتك
وأذهب لكل جيرانك لتشغيله وكل المحلات المحيطه
بشرط المعامله الحسنه فى القاء الأقتراح على الأخرين

أقسم بالله العظيم لو شغلنا قرأن على قد ما نقدر مع الأخذ يالأسباب
هنقدر فعلا نعدى اليوم دا على خير أبدأ بنفسك

وهذا الكلام مش من باب الدروشه دا كلام علمى خطير بس مفيش وقت
لمزيد من الشرح الوقت دلوقتى للتنفيذ

يارب أنصرنا على أنفسنا
ألا بذكر الله تطمئن القلوب

Share

أرجوكم أقرأوا النوت بالله عليكم

ناس كتير بتبعتلى على رأيى وتقولى أعمل حاجه
أنا مشلول من اللى بيحصل


أمبارح كنت فى المظاهرات بنادى بحقنا وحق مصر وحق ناس أتظلمت
وناس باتت فى الشارع وناس أتقتلت وأم بتبكى على أبنها
وشاب كبر لقى مجتمع فاسد
أتكلمنا وعلينا صوتنا وبصراحه قلينا أدربنا على مبارك


وأن كان فى نظرى يستاهل الحرق بجاز وسخ على اللى عمله فينا
بس دلوقتى حاسس بفتنه كبيره الموضوع مش بقى شباب بتدور على حقها
الموضوع كبر قوى بقى فتنه
ودخل فيه المصالح


بالله عليكم علشان البلد دى تفضل فى أمان حاول تفكر فى كل كلمه
قبل ماتقولها ممكن كلمه تشحن الناس وزنبهم يبقى فى رقبتك ليوم القيامه


الموضوع دلوقتى عدى مبارك والمعاضه ومابقاش ثوره شباب
الموضوع بقى فتنه
الفتنه أشد من القتل


ياجماعه ندى الناس دى فرصه مش علشان مبارك صعب عليا ولا علشان
كلامه زكى وضحك عليا لأ والله بس علشان ممكن تكون نيتنى خير وتتقلب بفتنه
ربنا أعلم باللى بيا دلوقتى واللى بيك أنت كمان
بس خد بالك من كل كلمه بتقولها


ولو خايف أن مبارك يرجع فى كلامه مش هقولك فى ضمانات بس هقولك الاكبر أنت سايب لربنا ولو مبارك حاول يكون مكار أو غدار فمكر الله شديد
مكر الله هو اللى خله ذكاءه يخونه وشباب تطلع تخسف بيه الأرض


بالله عليك حاول تهدىء وتهدىء اللى تقدر عليه
حاسس بمسئوليه كبيره
لو البلد دى خربت  مش هسامح نفسى حتى لو مليش زنب وأنت كمان


مش بقول أدى فرصه لحكم مبارك بس بقول أدى فرصه لنفسك تعامل ربنا
ولو مش مقتنع بكلامى قوم صلى أستخاره واللى ربنا يهدى قلبك له أعمله


فى ناس كتير بياخدها الحماس بس والله العظيم ممكن بعد كده نندم ونندم قوى
لازم يكون عندنا ثقه فى ربنا أن هو اللى ساعدنا فى ثورتنا وهو اللى هيوفقنا
الموضوع بدأ حلو مش عايزينه ينتهى بخيبه أمل


أسف لو فى كلام مش واضح أو كلمه خارجه
بس ربنا يعلم باللى حاسس بيه
أخوكم
محمد زكريا