الثلاثاء، 19 أبريل 2011

الحصاله


هشام الجخ ... عمرو قطامش من الشخصيات اللى أشتهرت مره واحده 
ويمكن ناس كتير بتقول دا حظهم عالى 
بس الكثير ميعرفش أن هشام بيقول شعر وبيحاول ينجح بقالوا أكثر من 13 سنه
وعمرو بيسعى بقالوا سنين بيدور ع الفرصه 
هشام وعمرو وغيرهم كتير أطبق عليهم مبدأ الحصاله اللى ممكن يطبق عليك فى أى وقت 

زمان واحنا صغيرين كنا بنحوش الفلوس فى الحصاله ممكن تحرم نفسك من حاجه علشان تحوش
وممكن تحوش الزياده منك وبعد فتره تبدأ تفتح الحصاله وتنغنغ نفسك وتخدلك يومين 
والمبدأ دا مش بيطبق بس ع الفلوس دا كمان ع الجهد والأفكار

يعنى حضرتك تشتغل وتتعب وتأخد أقل ما انت متوقع تخلص فى شغلك قوى والنتيجه مخزله
وطبعا تتضايق وتتعب لأنك ببساطه متعرفش مبدأ الحصاله أنك جزء من جهدك بتاخده دلوقتى 
والجزء التانى فى الحصاله بيزيد تلقائى 
فلما الحصاله تتفتح تلاقى فتح كبير قوى من ربنا عليك تستغرب وتقول أزاى أنا زمان كنت بعمل أكتر من 
كده منجحتش ليه وناسى أن اللى فى الحصاله نتيجه لجهد دلوقتى وزمان

حواليا ناس كتيره بتملى حصلتها دلوقتى ومنهم محمد شاكر وسيد شعبان وأسلام حمزه وغيرهم 
وهيجى يوم بأذن الله الحصاله تتفتح ويلاقوا أضعاف أضعاف النجاح

أما عن حصلتى أنا فبحاول أملاها بطريقه مختلفه 
بحاول أكون سعيد بكل لحظه فى حياتى يعنى أنا دلوقتى مش معايا عربيه وخلال شهور هجيبها بأذن الله 
فكل مواصله بركبها دلوقتى هى جزء من جهد بيروح للحصاله بحاول أستمتع بكل خطوه لأن الحصاله لما تتفتح 
الله أعلم هعرف أمشى بحريه زى الاول ولا لأ
يعنى بمشى وبجرى فى الشارع وبأكل وأنا ماشى وبفتح أيدى ع الأخر وأحضن الدنيا
ياترى لما الحصاله هتتفتح هعرف أعمل كده 

من الناس اللى الحصاله عندها أتفتحت من سنين وربنا كرمه ببقائها الشيخ محمد متولى الشعراوى
حصلته كانت له ولأولاده اللى عايشين ع سيرته الطيبه رافعين راسهم لأفضل حصاله أتفتحت فى عهدنا
أتعلمت منه حاجاتين 
الاولى أنكسار النفس 
والثانيه التواضع والبساطه 
ودول أقوى سرين للنجاح

الأنكسار لله بيديك قوه وكاريزما وحضور قوى والبساطه بتديك سحر
أوقات الناس بتسقفلى ونفسى بتفرح وأرجع أأنب نفسى دول بيسقفوا لعظمه الله مش ليكى
أنت زيك زى أى حد بس حكمه ربنا وأرادته هى اللى عايزه كده 


حاجه كمان أتعلمتها من الحصاله أن أفكارى ونجاحى هو هبه من الله وهو تجسد لأراده الله
علشان كده عمرى ما أتذل لبشر أو أنافقه لأن ببساطه أراده الله لا تنحى لبشر وليس لى أن أفعل ذلك 
أنا وكل من يبحث عن النجاح سنصل بأذن الله وتفتح الحصاله فلا داعى للنفاق أو الذل 
علشان كده أتعلمت أطلب بعزه نفس 

أخر حاجه بقى هى ياترى لما الحصاله تتفتح هعرف أستمتع بحياتى زى دلوقتى علشان كده بحاول أستمتع بكل لحظه مع أصحابى
لشىء بسيط ممكن حصلتى تتفتح بره مصر فأبعد عنهم 
وممكن هما اللى حصليتهم تتفتح فالدنيا تاخدهم 

فى النهايه 
الدنيا حصاله بتحوشلك أحساسك ونجاحك وبتزوده أوعى تندم ع اللى فات وحط فيها ع قد ما تقدر لوجه الله
وأستمتع بحياتك وبالوقت الحالى قوى 
وكلمه ثقه فى الله حصلتك هتتفتح هتتفتح فعيش الدنيا بالحب

محمد زكريا 
19 - 4 - 2011

للتعليق ع الفان بيدج الخاصه بالمدرب ومعرفه الأخبار الجديده
يمكنك الضغط على الرابط