السبت، 9 أبريل 2011

كبسولات للحفظ السريع

السلام عليكم ورحمه الله وبركاته

أكيد الناس بدأت تذاكر وبدأت تجيلى اسئله كتيره عن المذاكره
فقررت أنى أعمل أكتر من نوت على مدار أبريل
هدفى فيهم هو كيفيه الحفظ
وأنسب الأوقات للحفظ وللمذاكره وطرق مبتكره للحفظ
وأزاى أشغل فصين العقل فى نفس الوقت للحفظ

فى البدايه فى ثلاث جوانب للمذاكره علشان تكون مثمره
1 - الذاكره والحفظ ودا اللى هنعرفه سوا
2- الخرائط الذهنيه ودى تقدر تعمل عليها سيرش وتتعلمها من النت
3- القرأه السريعه ودى لازم تكون عمليا ماينفعش تقرأ فيها كتاب
لأنها قايمه على الممارسه

الذاكره
أول كبسوله هى الايحاء
ناس كتيره بتردد عبارات زى بنسى بسرعه أو عندى ذاكره سمكه
ويمكن يكون كمان متباهى أو بيردد ومش عارف مدى تأثير الكلمات دى عليه
ببساطه أى حاجه حضرتك بتقولها لنفسك وبترددها كتير بتبقى واقع
يعنى الأفضل أنك تردد عبارات زى
أنا بحفظ بسرعه . ذاكرتى حديديه
فى الأول هحس أنى بتضحك على نفسى بس بعد فتره من الترديد
هلاقى نفسى فعلا بحفظ أحسن وبسرعه أكتر

ممكن تعمل التمرين دا وهو سهل جدا
لما تتعرف على ناس جدد جرب مع نفسك تحفظ أسمائهم من أول اللقاء
وأخر اللقاء أتأكد أنك فاكر الأسماء
وأدى لنفسك درجه من 10 على حفظك أو نسبه من 100
جرب تانى وتالت ورابع
المفاجأه أنك هتلاقى الموضوع بقى عاده أنك تحفظ الأسماء بسرعه ومن
أول جلسه

طيب خد دى وحافظ عليها
كل يوم قبل ما تنام ردد اللى عايز تحفظه بصوت مسموع
وخصوصا قبل النوم مباشرا
أول ما تصحى تانى يوم , أول حاجه تعملها بعد ما تشكر ربنا هات الكتاب وراجع تانى
وأوعدك بذاكره حديديه

بسرعه كل يوم قبل ما تنام أستعرض الحاجات الأيجابيه فى يومك
ملحوظه الايجابيه بس والناس الكئيبه بلاش كئابه قبل النوم عندك اليوم طويل

كبسولات سريعه وهنتكلم عنها بالتفاصيل المرات اللى جايه
غير خلفيه الموبايل واللاب بالحاجه اللى بتزود طاقتك

كل 30 دقيقه مذاكره خد 3 دقايق راحه

لو بتذاكر وفجأه روحت تفتح الثلاجه اللى أنت متأكد أو متأكده
أنها مفهاش جديد معنى كده أنك مركز على شق واحد من المخ
وغالبا هيكون الشمال يبقى أعمل خريطه ذهنيه ومنك وفتحت الثلاجه أشرب بقى
على ثلاث مرات لأنها سنه وأذكر أسم الله على الميه قبل الشرب

رتب مكانك وبلاش تذاكر ع السرير وشيل الدبدوب من على مكتبك بعد أزنك
والمره الجايه هقولك تتعامل أزاى مع الكتب
وأزاى تفتح ملف فى مخك بالكتب وأزاى تخلص الكتاب
وتعمل أيه علشان تحفظ وأيه علشان تفهم

المهم دلوقتى بقى دعواتك
وأبعت الكلام دا لأصحابك
وربنا معاك


محمد زكريا
10 - 4 - 2011


منتظر تعليقك او اى استفسار او سؤال هنا او على الفان بيدج
اللينك
http://www.facebook.com/notes/trainer-mohamed-zakaria-%D8%A7%D9%84%D9%85%D8%AF%D8%B1%D8%A8-%D9%85%D8%AD%D9%85%D8%AF-%D8%B2%D9%83%D8%B1%D9%8A%D8%A7/%D9%83%D8%A8%D8%B3%D9%88%D9%84%D8%A7%D8%AA-%D9%84%D9%84%D8%AD%D9%81%D8%B8-%D9%88%D8%A7%D9%84%D9%85%D8%B0%D8%A7%D9%83%D8%B1%D9%87/137877129618647


شير فى الخير
(:

ربنا يوفقكم